Man. Utd verður á heimavelli næstu vikurnar

Heima er best segir máltækið og undir það tekur Wayne Rooney, framherji Man. Utd. Hann vonast til þess að liðið geti nýtt sér í botn að spila næstu fjóra leiki sína á heimavelli.

United tekur á móti Norwich á morgun, Real Madrid í næstu viku, Chelsea kemur svo í bikarleik og loks er það deildarleikur gegn Reading þann 16. mars.

"Dagurinn fyrir útileiki fer í ferðalög og inniveru á hóteli. Við förum líka á hótel fyrir heimaleiki en það er allt annar undirbúningur og svo er mikill munur einfaldlega að spila á heimavelli," sagði Rooney.

"Á útivelli spilum við leikinn og svo er ferðalag aftur heim. Eftir heimaleiki get ég komist heim á 40 mínútum. Það hjálpar mikið. Það er mjög ljúft að fá nokkra heimaleiki núna í röð."