Ungir enskir leikmenn fá ekki tækifæri í ensku úrvalsdeildinni.

Það voru ákveðin tímamót í enskri knattspyrnu um liðna helgi þegar enska úrvalsdeildin fór í gang á ný. Aldrei hafa færri enskir leikmenn verið í byrjunarliðum í úrvalsdeildinni og þykir þetta mikið áhyggjuefni fyrir enska knattspyrnu í heild sinni.

Rúmlega 33 prósent þeirra leikmanna sem hófu leik með sínum liðum voru Englendingar en í ágúst árið 1992 var þessi tala 73 prósent.

Enska úrvalsdeildin kemst ekki með tærnar þar sem aðrar deildir í Evrópu hafa hælana en í spænsku, þýsku, ítölsku og frönsku úrvalsdeildunum er þessi tala mun hærri.

Af 61 leikmanni sem hefur gengið til liðs við félag í ensku úrvalsdeildinni í sumar eru aðeins tólf enskir. Liðin sem höfnuðu í efstu átta sætunum í úrvalsdeildinni á síðasta tímabili hafa ekki fengið einn einasta enskan leikmann í sínar raðir.

Enska U-21 árs landslið Englendinga valtaði yfir það skoska, 6-0, í vináttulandsleik í síðustu viku en aðeins voru þrír leikmenn liðsins í byrjunarliðinu í fyrstu umferð ensku úrvalsdeildarinnar.

„Við gerum okkur grein fyrir stöðunni og erum ávallt að vonast eftir því að fleiri ungir enskir leikmenn fái tækifærið hjá liðum í ensku úrvalsdeildinni,“ sagði Sir Trevor Brooking, hæstráðandi hjá enska knattspyrnusambandinu, í samtali við fjölmiðla ytra.

U-21 landslið Englendinga fékk ekki eitt einasta stig á Evrópumótinu í Ísrael í sumar og fóru þá viðvörunarbjöllur að hringja.