Willian vill fara til Chelsea

Framtíð Brasilíumannsins Willian er að skýrast en Jose Mourinho, stjóri Chelsea, heldur því fram að leikmaðurinn sé búinn að velja Chelsea.

Miðjumaðurinn var kominn með annan fótinn til Tottenham og búinn að fara í læknisskoðun hjá félaginu þegar Chelsea blandaði sér í slaginn.

Skömmu eftir læknisskoðunina sagðist Willian vera að skoða sín mál. Það kom öllum á óvart en menn vissu þá ekki að Chelsea hefði ákveðið að senda Anzhi tilboð í hann. Rússneska félagið vill fá 30 milljónir punda fyrir leikmanninn.

"Ég held að hann sé búinn að ákveða sig. Það er hættulegt að tala of snemma því fótboltaheimurinn er brjálaður. Ég veit samt hvað leikmaðurinn vill gera og því er ekki hægt að fela sig," sagði Mourinho.