Holtby vill fleiri tækifæri

Lewis Holtby, liðsfélagi Gylfa Þórs Sigurðssonar hjá Tottenham, segist gjarnan vilja fá fleiri tækifæri í byrjunarliðinu en hann hefur fengið.

Holtby kom til Tottenham frá Schalke fyrir tæpu ári síðan og síðan þá komið við sögu í 38 leikjum, þar af 20 sinnum sem varamaður. Hann hefur einu sinni verið í byrjunarliðinu eftir að Tim Sherwood tók við knattspyrnustjórn Tottenham og einu sinni komið inn á sem varamaður.

Hann segist vera ánægður hjá Tottenham þó svo að hann útiloki ekki að snúa aftur í þýsku úrvalsdeildina einn daginn.

„Ég naut mín hjá Schalke þó svo að það hefði ekki litið þannig út síðustu mánuði mína þar,“ sagði Holtby í samtali við þýska dagblaðið Bild.

„Hlutirnir eru fljótir að breytast í fótboltanum en það hefur gengið á ýmsu hjá mér persónulega. Það er mikil samkeppni um stöður og þó svo að ég hafi fá tækifæri fengið er ég samt kominn með þrjú mörk og níu stoðsendingar á tímabilinu.“

„Það er góð tölfræði og ég vil án nokkurs vafa fá fleiri tækifæri með byrjunarliðinu.“