Ataði sig blóði hinna látnu til að blekkja gíslatökumennina

Sneha Kothari Mashru, kenísk útvarpskona sem var stödd í verslanamiðstöðinni í Naíróbí sem skæruliðar réðust inn í á laugardag, segist hafa atað sig blóði til þess að blekkja gíslatökumennina.

Táningspiltur lést við hliðina á Mashru í skothríð og smurði hún blóði hans á handlegg sinn í von um að gíslatökumennirnir héldu að hún væri látin. „Ég setti mikið af blóði úr honum á handlegg minn, eins mikið og ég gat, og svo huldi ég andlit mitt eigin hári,“ segir Mashru í samtali við Daily Mail.

Mashru segist vilja vita nafn drengsins en auk hans létust að minnsta kosti 71 í árásinni. Talið er að sú tala eigi eftir að hækka, en 175 eru slasaðir.