Umsátur um árásarmennina

Að minnsta kosti 59 er látnir og 175 slasaðir eftir árás íslamska öfgahópsins, Al-Shabab, á verslunarmiðstöð í Nairóbí í Kenía í gær.

Vísir sagði frá því í gær að árásarmennirnir hafi ráðist grímuklæddir inn í verslunarmiðstöð og skipað öllum múslimum að yfirgefa staðinn en hafi skotið þá sem þeir töldu ekki vera múslima.

Mikill viðbúnaður er við verslunarmiðstöðina og á vef BBC segir að skothvelli megi heyra á vettvangi. Árásarmennirnir eru nú króaðir af í matvöruverslun á einni hæð verslunarmiðstöðvarinnar en lögregluyfirvöld segjast hafa stjórn á ástandinu þessa stundina.

Um 4000 hermenn frá Kenía eru nú í Sómalíu og hafa barist við íslamska öfgahópa frá árinu 2011. Al-Shabab hópurinn sem lýsti ábyrgð á ódæðinu segir veru þessara hermanna í Sómalíu og hernaðarafskipti Kenía í Sómalíu vera ástæður árásarinnar.

Al-Shabab segjast hafa 36 gísla í verslunarmiðstöðinni en yfirvöld vilja ekki staðfesta þá tölu.

Forseti Kenía, Uhuru Kenyatta, hefur heitið því að elta árásarmennina uppi, hvert sem þeir kunni að flýja.