Maður finnur bara til svo mikillar reiði

Að minnsta kosti 62 eru látnir eftir gíslatökuna í Kenía, en liðsmenn skæruliðahreyfingarinnar Al Shabab réðust inn í verslanamiðstöð í Naíróbí á laugardag.

Meðal hinna látnu voru þau Elif Yavuz og Ross Langdon, verðandi foreldrar sem voru á leið í mæðraskoðun í verslanamiðstöðinni, en Yavuz var komin átta og hálfan mánuð á leið með sitt fyrsta barn þegar hún lést.

Þóra Arnórsdóttir var bekkjarsystir Yavuz í Johns Hopkins-háskóla en þær lærðu saman þróunarhagfræði og alþjóðastjórnmál á árunum 2002 til 2004. Yavuz kom frá Hollandi og var 33 ára þegar hún lést.

„Mörg bekkjarsystkini mín starfa við erfiðar aðstæður um allan heim en Yavuz var ekki á átakasvæði,“ segir Þóra. „Þetta var því hræðileg tilviljun að hún skyldi hafa verið þarna og maður bjóst ekki við slíkum fréttum.“

Bekkjarsysturnar fylgdust hvor með annarri í gegnum samfélagsmiðla eftir skólagönguna og segir Þóra Yavuz hafa verið mikinn töffara. „Hún var algjör nagli og búin að vinna fyrir Clinton-stofnunina og Bill & Melinda-stofnunina, hafði starfað mikið í Afríku, og var að klára doktor frá Harvard í lýðheilsufræði. Hún var til dæmis kasólétt þegar hún tók í höndina á Clinton. Alveg brilljant manneskja.“

Þóra er slegin yfir fréttunum frá Naíróbí. „Maður finnur bara til svo mikillar reiði. En þetta minnir mann á að það er ekki þannig að þó hlutirnir gerist í útlöndum að þá komi þeir manni ekki við.“