Herinn ræðst til inngöngu

Byssuskot og sprengingar hafa heyrst frá verslunarmiðstöðinni í Naíróbí, höfuðborg Kenía, þar sem liðsmenn skæruliðahreyfingarinnar Al Shabab hafa haldið hundruðum gísla föngnum síðan á laugardag.

Svo virðist sem kenískar hersveitir hafi ráðist til inngöngu í verslunarmiðstöðina.

Nærri 70 manns hafa nú þegar látið lífið og hátt í 200 manns særst í átökunum. 

Ekki er vitað hve margir gíslar eru inni í verslunarmiðstöðinni, en talið er að gíslatökumenn séu um það bil tíu talsins. 

Sómalska Al Shabab hreyfingin hefur lýst yfir ábyrgð á árásinni á verslunarmiðstöðina á laugardag og segir hana gerða í hefndarskyni vegna aðgerða keníska hersins í Sómalíu.

Á meðal hinna látnu er frændi forseta landsins, Uhuru Kenyatta, og kærasta hans.

Þá er Kofi Awhoonor, þekkt skáld og prófessor frá Gana, einnig meðal hinna látnu.