Sturridge: Snýst um liðið en ekki einstaklinga

Afmælisbarnið og markaskorari Liverpool í 1-0 sigri á Manchester United var eldhress í viðtölum eftir leik.

„Brendan hefur verið að leggja áherslu á að þetta snýst um liðið en ekki einstaklinga. Við höfum verið að vinna vel í því sem lið og við sýndum það á vellinum í dag. Við ætluðum okkur að vinna saman fyrir aðdáendurnar sem lið,"

Roy Hodgson, þjálfari enska landsliðsins var á vellinum og Sturridge þakkaði honum traustið.

„Það er frábært að sjá að hann fylgist með manni, ég var í örlitlu veseni með lærið á mér fyrir leikinn og það hefur verið að halda örlítið aftur af mér. Ég ætti hinsvegar að vera orðinn góður fyrir landsleikina framundan,"

Brendan Rodgers, stjóri Liverpool var ánægður með sína menn í viðtölum eftir leik.

„Þetta gerir helling fyrir sjálfstraustið okkar. Við vorum að gera jafntefli í þessum stórleikjum í fyrra og töpuðum báðum leikjunum gegn Manchester United. Síðan í janúar höfum við verið á uppleið og þetta var enn einn sigurinn þegar kemur að því. Við vorum ekki jafn sóknarsinnaðir og við hefðum viljað en við erum vonandi komnir með hugarfarið að ná árangri í svona leikjum," sagði Rodgers.