Demichelis genginn til liðs við Manchester City

Martin Demichelis er genginn til liðs við Manchester City en talið er að City greiði fjórar milljónir punda fyrir krafta hans. Þetta er í þriðja sinn sem hann mun vinna með Manuel Pellegrini, þjálfara Manchester City eftir tíma þeirra hjá River Plate og Malaga.

Demichelis sem er 32 ára varnarmaður hefur spilað 37 leiki fyrir argentíska landsliðið og lék 174 leiki fyrir Bayern Munchen. Samningur Demichelis hjá Malaga rann út í vor og skrifaði hann undir tveggja ára samning hjá Atletico Madrid. Hann var þó fljótur að stökkva á tækifærið þegar gamli stjórinn hringdi.

„Ég er hæstánægður að hafa gengið til liðs við klúbb eins og Manchester City því ég er ennþá hungraður í árangur. Þetta er ellefta árið mitt í Evrópu og mér bauðst spennandi möguleiki að koma til Englands í jafn sterkan klúbb. Ég hef búið í Evrópu lengi svo vonandi get ég verið fljótur að aðlagast, núna ætla ég að endurgjalda traustið sem Manuel sýndi mér á vellinum. Ég get ekki beðið eftir að spila minn fyrsta leik," sagði Demichelis.