Cardiff að tryggja sér þjónustu Odemwingie

Það varð ekkert að því að Alfreð Finnbogason yrði liðsfélagi landa síns Arons Einars Gunnarssonar hjá enska úrvalsdeildarliðinu Cardiff City eins og orðrómur var um í síðustu viku. Cardiff ætlar að leysa framherjamál sín með Peter Odemwingie.

Enskir fjölmiðlar segja frá því að Peter Odemwingie sé í læknisskoðun hjá Cardiff City og að félagið sé að komast að samkomulagi um kaupverðið við forráðamenn West Bromwich Albion.

West Bromwich Albion vill fá fjórar milljónir punda fyrir þennan 32 ára framherja sem komst í ónáð hjá félaginu þegar hann reyndi að þvinga félagsskipti yfir í Queens Park Rangers. Samningur Odemwingie við WBA rennur út næsta sumar.

Peter Odemwingie mætti á Loftus Road á lokadegi félagsskiptagluggans í janúar og reyndi að pressa á það að QPR keypti hann frá Albion-liðinu en hlaut að launum 75 þúsund punda sekt (14 milljónir íslenskra króna) og fékk ekki að spila aftur fyrr en 23. febrúar. Hann hefur ekki fengið að spila á þessu tímabili en fær nú tækifæri til að endurvekja feril sinn hjá Cardiff City.