Walcott: Rooney leit út eins og leikari í hryllingsmynd

Wayne Rooney gat ekki spilað með Manchester United í stórleiknum á móti Liverpool um helgina og missir líka af leikjum með enska landsliðinu. Hann fékk stóran skurð á höfuðið á síðustu æfingu United fyrir Liverpool-leikinn.

Wayne Rooney er vel merktur eftir skurðinn og liðsfélagi hans hjá enska landsliðinu, Theo Walcott hjá Arsenal, tjáði sig um ástandið á Rooney.

„Rooney lítur út eins og leikari í hryllingsmynd," sagði Theo Walcott við Daily Mirror.

Það þurfti að sauma tíu spor í höfuð Rooney eftir samstuð við Nemanja Vidic en hann fékk takka Serbans í andlitið.

„Ég hef séð mynd af honum og þetta var mjög stór skurður. Þetta var ekki falleg sjón," sagði Walcott.

Rooney missir af landsleikjum við Moldavíu og Úkraínu og það má einnig búast við því að hann missi líka af fyrstu leikjum Manchester United eftir landsleikjahléið.