„United þarf yfirmann knattspyrnumála“

Manchester United þarf aðstoð þegar kemur að félagaskiptum leikmanna. Þetta er mat Damien Comolli sem gegndi stöðu yfirmanns knattspyrnumála hjá Tottenham og Liverpool.

David Moyes, stjóri Manchester United, og framkvæmdastjórinn Ed Woodward eru tiltölulega nýkomnir til starfa hjá Englandsmeisturunum. Óhætt er að segja að frammistaða þeirra á félagaskiptamarkaðnum hafi valdið mörgum stuðningsmönnum liðsins vonbrigðum.

Félaginu tókst ekki að klófesta fjölmarga leikmenn sem sóst var eftir. Marouane Fellaini gekk svo í raðir félagsins á lokaandartökum félagaskiptagluggans fyrir 27,5 milljónir punda.

„Ef það er eitthvert félag sem vantar yfirmann knattspyrnumála þá er það United,“ hefur BBC eftir Comolli. „Það myndi auðvelda bæði Moyes og Woodward störf sín.“

Sir Alex Ferguson yfirgaf United í lok síðustu leiktíðar eftir tæp 27 ár í starfi. David Gill, framkvæmdastjóri félagsins, hélt einnig á braut í júní.

Comolli segir að yfirmaður knattspyrnumála hefði hjálpað þeim tveimur og létt pressuna sem störfunum fylgi.

„David kom ekki til félagsins fyrr en 1. júlí sem er frekar seint,“ sagði Comolli.

„Vandamál United er að tveir mikilvægustu starfsmenn félagsins, Sir Alex og David Gill, hættu störfum og nýir aðilar komu inn í sínum fyrsta félagaskiptaglugga.“

Comolli segir ljóst að annaðhvort hafi félagið ekki verið tilbúið eða tvímenningarnir ekki reiknað með því hve erfitt starfið yrði og því lent í erfiðri stöðu.