Sturridge meiddur | Missir af landsleiknum gegn Moldóvu

Enska landsliðið í knattspyrnu verður án krafta Daniel Sturridge er liðið mætir Moldóvu í undankeppni HM annað kvöld.

Sturridge, sem farið hefur á kostum með Liverpool á leiktíðinni og skorað þrjú sigurmörk í jafnmörgum leikjum, glímir við meiðsli í læri.

Framherjinn fann fyrir meiðslunum í sigurleik Liverpool gegn Manchester United en harkaði þau af sér. Brendan Rodgers, stjóri Liverpool, hafði áhyggjur af því að Sturridge spilaði með landsliðinu meiddur. Framherjinn hélt engu að síður til móts við landsliðið en gat ekki æft þegar til þess kom.

Sturridge hittir enska hópinn aftur um helgina að því er Guardian greinir frá. Þá verður metið hvort hann geti farið með liðinu til Úkraínu þar sem liðið mætir heimamönnum á þriðjudag.

Landsleikur Englands og Moldóvu annað kvöld verður í beinni útsendingu á Stöð 2 Sport og Sport 2. Leikurinn hefst klukkan 19.