Enn fækkar í framherjahópi enska landsliðsins

Roy Hodgson, þjálfari enska landsliðsins, var ekki alltof kátur þrátt fyrir 4-0 sigur á Moldavíu í undankeppni HM á Wembley í gær því framundan er erfiður leikur í Úkraínu og enn fækkaði í framherjahópi enska landsliðsins.

Danny Welbeck skoraði tvö mörk í sigrinum á Moldavíu í gær en fékk gult spjald sem þýðir að hann verður í banni í Úkraínuleiknum á þriðjudaginn.

Roy Hodgson gagnrýndi ákvörðun dómarans en honum fannst þetta miklu meira en harður dómur. Hinn 22 ára gamli Welbeck fékk spjaldið fyrir að sparka boltanum í burtu.

„Við vorum þegar búnir apð missa Wayne Rooney og Daniel Sturridge. Þetta tekur gljáann af góðri frammistöðu," sagði Roy Hodgson sem er einnig án Andy Carroll sem er meiddur á ökkla.

Rickie Lambert skoraði hinsvegar í fyrsta landsleik sínum í byrjunarliðinu auk þess að leggja upp tvö mörk fyrir Danny Welbeck. Fyrirliðinn Steven Gerrard skoraði síðan fjórða markið.