Úthúðað fyrir að slasa poppsöngvara

Gabriel Agbonlahor, leikmaður Aston Villa í ensku úrvalsdeildinni, fékk að heyra það á samfélagsmiðlum í gærkvöldi frá aðdáendum hljómsveitarinnar One Direction.

Agbonlahor var í Glasgow í gærkvöldi þar sem ágóðaleikur til styrktar Stilyan Petrov, fyrrverandi leikmanni Celtic og Aston Villa, sem leggja þurfti skóna á hilluna eftir að hafa greinst með hvítblæði.

Fjölmörg kunnugleg andlit tóku þátt í leiknum og þeirra á meðal var Louis Tomlinson, söngvari One Direction. Í eitt skipti í leiknum fékk Tomlinson boltann og Agbonlahor pressaði hann strax. Sparkaði hann boltanum í burtu en óhætt er að segja að Tomlinson hafi fundið fyrir tæklingunni og lá meiddur eftir. Þurfti hann að yfirgefa völlinn og ekki bætti úr skák þegar hann fann til ógleði og leið illa á hliðarlínunni.

Aðdáendur One Direction brugðust illa við tilburðum Agbonlahor. Hótuðu þeir honum öllu illu á Twitter. Var honum bæði hótað lífláti og að skorið yrði undan honum svo tvö af grófari dæmunum séu nefnd.

Agbonlahor til varnar þá var ekkert að tæklingu hans. Um leið og ljóst var að Tomlinson þyrfti á aðhlynningu að halda skokkaði Agbonlahor í áttina til hans og baðst afsökunar.

Tæklinguna má sjá á vef BBC.