Nær Liverpool að kaupa tvo varnarmenn fyrir United-leikinn?

BBC segir frá því í dag að Liverpool hafi sett stefnuna á að ganga frá kaupum á tveimur varnarmönnum áður en kemur að leik liðsins á móti Englandsmeisturum Manchester United á sunnudaginn.

Leikmennirnir eru Mamadou Sakho, 23 ára miðvörður Paris St Germain, og Tiago Ilori, tvítugur miðvörður Sporting Lisbon.

Ben Smith hjá BBC hefur heimildir fryir því að Liverpool sé í viðræðum við bæði félögin. Það er búist við því að þeir mæti í læknisskoðun á Anfield á næstu 24 tímum.

Mamadou Sakho getur bæði spilað sem miðvörður og sem vinstri bakvörður en hann á að baki fjórtán A-landsleiki fyrir Frakka. Sakho mun líklega kosta Liverpool í kringum 13 milljón punda.

Tiago Ilori er einn af efnilegustu varnarmönnum í Portúgal en hann hefur spilað fyrir 18, 19 og 20 ára landslið Portúgals. Ilori er fæddur í London og á enskan föður af nígerískum ættum.