Tottenham búið að kaupa Christian Eriksen frá Ajax

Tottenham tilkynnti í kvöld að félagið væri búið að kaupa Danann Christian Eriksen frá Ajax en með því eykst samkeppnin enn frekar fyrir íslenska landsliðsmanninn Gylfa Þór Sigurðsson. Kauðverðið er talið vera í kringum 11 milljónir punda.

Christian Eriksen er þriðji leikmaðurinn sem gengur til liðs við Tottenham í dag en hinir eru Erik Lamela frá Roma og Vlad Chiriches frá Steaua Búkarest.

Tottenham er við það að selja Gareth Bale fyrir metfé til Real Madrid en forráðamenn Tottenham hafa verið afar duglegir að styrkja liðið í þessum félagsskiptaglugga.

Christian Eriksen er 21 árs gamall en hefur engu að síður verið hjá Ajax frá árinu 2008. Hann lék áður með OB í Danmörku.

Christian Eriksen hefur verið í danska landsliðinu síðan að hann var 18 ára og var meðal yngsti leikmaðurinn á HM 2010 í Suður-Afríku. Eriksen hefur þegar leikið 37 landsleiki fyrir Dana og skoraði í þeim fjögur mark þar af það fyrsta á móti Íslandi á Laugardalsvellinum 4. júní 2011.

Eriksen var með 2 mörk og 3 stoðsendingar í fyrstu fjórum deildarleikjum sínum með Ajax á þessu tímabili en á því síðasta var kappinn með 10 mörk og 17 stoðsendingar í 33 leikjum og tímabilið á undan voru þetta 19 stoðsendingar og 7 mörk í 33 leikjum. Eriksen hefur þrisvar orðið hollenskur meistari með Ajax.

Hér fyrir neðan má sjá mynd af Christian Eriksen með Tottenham-búninginn sem birtist á twittersíðu Tottenham í kvöld.