Lambert fór hræðilega með mig

Framherjinn Darren Bent er allt annað en ánægður með Paul Lambert, stjóra Aston Villa, sem hann segir hafa farið hræðilega með sig. Bent er nýfarinn að láni til Fulham út leiktíðina en hann var ekki í myndinni hjá stjóranum.

Hinn 29 ára gamli Bent vonast til þess að skiptin til Fulham komi ferli hans aftur í gang.

"Það var farið hræðilega með mig. Það var ekki bara út af meiðslunum mínum þó svo það hafi ekki hjálpað. Það var öll óvissan," sagði Bent.

"Ég skil vel að allir leikmenn geta ekki verið uppáhald þjálfarans. En að vera útilokaður á þann hátt sem ég lenti í er hryllilegt. Mér var sparkað út úr búningsklefanum eftir að hafa spilað mikið og verið í landsliðinu. Það voru mikil vonbrigði.

"Ég hugsaði stundum hvort ég ætti þetta skilið. Ég er ekki bara hungraður í að spila fótbolta með Fulham. Ég er glorhungraður."