Chelsea neitar að gefast upp á Rooney

Jose Mourinho, stjóri Chelsea, segir að Wayne Rooney sé efstur á óskalista sínum yfir nýja framherja. Hann sé þó með önnur skotmörk fari svo að Chelsea fái ekki Rooney.

Man. Utd hefur þegar hafnað tveimur tilboðum frá Chelsea í leikmanninn og þriðja tilboðið er sagt vera á leiðinni.

"Við erum með plan B og plan C. Það þýðir ekkert að spyrja mig um nöfn því ég vil ekki tala um leikmenn annarra liða. Við munum reyna fram á lokadag félagaskiptagluggans að fá framherja," sagði Mourinho.

Chelsea er í eldlínunni í kvöld er liðið tekur á móti Aston Villa í ensku úrvalsdeildinni. Leikurinn er í beinni á Stöð 2 Sport 2.