Holloway kærður eftir fyrsta leik

Ian Holloway, stjóri Crystal Palace, þurfti aðeins einn leik í ensku úrvalsdeildinni til þess að lenda í vandræðum. Hann hefur verið kærður fyrir hegðun sína eftir leikinn gegn Tottenham.

Í kærunni kemur fram að orðalag Holloway og hátterni fyrir framan klefa dómaranna eftir leik hafi ekki verið í lagi.

Einnig hafi ummæli hans eftir leikinn ekki verið til fyrirmyndar en þar gaf Holloway í skyn að dómararnir væru hlutdrægir.

"Þetta á eftir að vera langur vetur hjá mér með þessa dómara. Ég þekki þetta frá því ég var með Blackpool. Ákveðin félög fá dæmdar aukaspyrnur en önnur ekki," sagði Holloway eftir leik.

Holloway á von á sekt eða leikbanni fyrir hegðun sína um síðustu helgi.