Ivanović tryggði Chelsea öll stigin

Chelsea hefur fagnað sigri í tveimur fyrstu leikjum sínum á tímabilinu og Jose Mourinho fær því draumabyrjun á Stamford Bridge. Chelsea vann 2-1 sigur á Arsenal-bönunum í Aston Villa á Brúnni í kvöld.

Branislav Ivanović tryggði Chelsea öll stigin með laglegu skallamarki 17 mínútum fyrir leikslok en markið átti líklega aldrei að standa auk þess að Serbinn átti jafnvel að vera farinn útaf með rautt spjald.

Aston Villa gat fengið eitthvað út úr þessum leik því Andreas Weimann fékk mjög gott færi á lokamínútunum og Aston Villa liðið átti að fá vítaspyrnu í uppbótartíma þegar John Terry fékk boltann í hendina í vítateignum.

Chelsea byrjaði af miklum krafti eins og í 2-0 sigrinum á móti Hull um helgina og var komið í 1-0 eftir sex mínútur. Markið skráist sem sjálfsmark Antonio Luna en Brad Guzan, markvörður Aston Villa, varði þá skot Eden Hazard í Luna og í eigið mark.

Aston Villa náði óvænt að jafna leikinn á þriðju mínútu í uppbótartíma fyrri hálfleiks þegar Christian Benteke skoraði eftir stoðsendingu frá Gabriel Agbonlahor. Christian Benteke skoraði tvö í 3-1 sigri á Arsenal í fyrstu umferðinni og er því kominn með þrjú mörk. Benteke var hættulegur

Branislav Ivanović skoraði sigurmarkið með skalla eftir aukaspyrnu Frank Lampard á 73. mínútu. Það var rangstöðulykt af markinu en það var dæmt gott og gilt.

Ivanović hefði líka getað verið farinn útaf með rautt spjald því skömmu áður fékk hann gult spjald eftir viðskipti sín við Christian Benteke.