Anelka í leyfi af persónulegum ástæðum

Samkvæmt heimildum Sky Sports virðist franski framherjinn Nicolas Anelka hafa yfirgefið æfingasvæði West Bromwich Albion í morgun.

Fyrstu fréttir af málinu voru á þá leið að leikmaðurinn hafi strunsað af svæðinu, pakkað saman öllu sínu dóti og tilkynnt starfsfólki félagsins að hann væri hættur í fótbolta.

Nú hefur félagið gefið út yfirlýsingu að Anelka sé kominn í frí af persónulegum ástæðum og verður því ekki með liðinu um helgina.

Anelka kom til WBA í sumar og lék sinn fyrsta leik fyrir liðið í ensku úrvalsdeildinni um síðustu helgi en nú virðist hann hafa lagt skóna á hilluna.