"Þyrfti að hugsa mig um ef Wenger færi“

Jack Wilshere, miðjumaður Arsenal, segir gagnrýnina sem knattspyrnustjórinn Arsene Wenger sætir fáránlega. Hann yrði að íhuga framtíð sína hjá félaginu ef Frakkinn hyrfi á braut.

Wenger hefur verið gagnrýndur töluvert fyrir að takast ekki að landa sterkum leikmönnum í sumar. Fjölmargir leikmenn hafa yfirgefið félagið í sumar en lítið að frétta af nýjum andlitum. Gonzalo Higuain, Wayne Rooney, Luis Suarez og Luiz Gustavo voru allir sterklega orðaðir við Lundúnafélagið en engin viðbót er komin.

„Ég vil vinna til verðlauna með Arsenal og vil vera hér lengi. Ef þjálfarinn yfirgefur félagið gæti orðið breyting á plönum mínum,“ er haft eftir Wilshere í fjölmiðlum ytra.

„Arsene Weger hefur verið hér í mörg ár og hann skilar alltaf titlum. Vissulega höfum við verið í lægð undanfarin fimm til sex ár en hann er frábær stjóri og fólk sem efast um það er ekki heilt.“

Wilshere benti að lokum á að Wenger hefði skilað Arsenal í Meistaradeildina sextán ár í röð.