Terry telur fimm lið eiga möguleik á titlinum

John Terry, fyrirliði Chelsea, telur að fjögur til fimm lið eigi möguleika á enska titlinum á tímabilinu og að baráttan verði galopin alveg til loka.

Chelsea mætir Manchester United á Old Trafford á mánudagskvöldið og verður það fyrstu leikur David Moyes, knattspyrnustjóra United, á heimavelli með liðið.

„Þetta verður gríðarlega erfitt á þessu tímabili,“ sagði Terry í enskum fjölmiðlum.

„Manchester United hirti titilinn nokkuð sannfærandi á síðasta tímabili en það verður ekki þannig að þessu sinni. Það verða fjögur eða jafnvel fimm lið í baráttunni um titilinn allt mótið.“

„Manchester City lítur gríðarlega vel út og ég sá þá ganga frá Newcastle um daginn. Tottenham, Arsenal verða einnig í baráttunni.“