Pellegrini vanmetur Cardiff ekki

Manuel Pellegrini knattspyrnustjóri Manchester City segir enga hættu á að lið sitt vanmeti nýliða Cardiff City þegar liðin mætast í ensku úrvalsdeildinni í fótbolta í dag klukkan 15:00 í beinni útsendingu á Stöð 2 Sport 3.

Manchester City hóf tímabilið með glæsibrag þegar liðið skellti Newcastle 4-0 á heimavelli sínum á mánudag. Pellegrini tekur áframhald á slíkri velgengni ekki sem sjálfsögðum hlut.

Cardiff leikur sinn fyrsta heimaleik í efstu deild í 51 ár og ættu leikmenn liðsins að vera tilbúnir að selja sig dýrt að því tilefni.

„Við vitum að Cardiff er erfitt lið við að eiga. Liðið er á heimavelli á sínu fyrsta tímabili í úrvalsdeildinni. Við þurfum að eiga frábæran leik án mistaka til að ná í önnur þrjú stig,“ sagði Pellegrini nú í aðdraganda leiksins.

Manchester City mun áfram reyna að leika hraðann sóknarleik eins og gekk svo vel gegn Newcastle.

„Við munum alls staðar reyna að leika á þá vegu sem ég tel best fyrir okkur. Okkur tókst mjög vel að leika eins og ég vil að liðið leiki.

„Það er ekki bara af því að við skoruðum fjögur mörk og héldum hreinu heldur hvernig við lékum leikinn. Við erum sóknarsinnað lið, það er mikilvægt í mínum huga. Þetta er bara byrjunin en hún var góð,“ sagði Pellegrini.

Aron Einar Gunnarsson er leikmaður Cardiff og lék allan leikinn í fyrstu umferðinni. Verði hann í liðinu í dag fær að hann að takast á við nokkra af bestu miðjumönnum heims um þessar mundir.