Mourinho: Þarft ekki að óttast að selja innan deildarinnar

Jose Mourinho knattspyrnustjóri enska úrvalsdeildarliðsins Chelsea segir að Manchester United ætti ekki að óttast að selja Wayne Rooney til Chelsea. Það sé best fyrir deildina að hann leiki áfram á Englandi.

Manchester United hefur hafnað tveimur tilboðum Chelsea í Rooney í sumar og hefur engan hug á því að selja öðru úrvalsdeildarfélagi leikmanninn öfluga.

Manchester United tekur á móti Chelsea á mánudagskvöldið á Stöð 2 Sport 2 og er talið að Chelsea geri þriðja tilboðið í leikmanninn eftir leikinn.

„Fyrir mér er þetta ekki flókið. Annað hvort viltu halda Rooney eða ekki,“ sagði Mourinho.

„Þessi gamaldags hugsun; 'ég sel ekki leikmenn innan sömu deildar' hún hjálpar engum. Stundum sendir þú leikmenn úr landi þegar þú ættir að halda þeim innan deildarinnar vegna þess að þá stuðlar þú að því að gera deildina þín þá bestu.

„Þú sérð þetta gerast á hverju einasta tímabili á Ítalíu. Filippo INzaghi lék fyrir Juventus og Milan. Af stóru leikmönnunum hefur aðeins Francesco Totti leikið fyrir eitt félag. Andra Pirlo hefur leikið fyrir Inter, Milan og Juventus,“ sagði Mourinho.

Fjölmiðlar á Bretlandi hafa gefið til kynna að skipti á Juan Mata og Rooney séu í pípunum. Mourinho segir ekkert hæft í því.

„Það eru bara vangaveltur vegna þess að þeir spurðu ekki út í það. Eina sem þeir hafa sagt við okkur er 'við höfnum tilboðinu' og 'við höfum ekki áhuga á að selja leikmanninn'. Ekkert annað hefur verið sagt,“ sagði Mourinho.