Tottenham á eftir Lamela og Eriksen í stað Bale og Willian

Enska úrvalsdeildarliðið Tottenham eygir nú argentínska framherjann Erik Lamela frá Roma eftir að liðið þurfti að horfa á eftir Willian til Chelsea. Tottenham horfir einnig til Danans Christian Eriksen til að fylla skarð Gareth Bale sem á leið til Real Madrid.

Lamela sem hefur skorað 21 mark í 62 leikjum fyrir Roma er sagður kosta Tottenham 25 milljónir punda nái Tottenham og Roma saman.

Með komu Lamela til Tottenham er talið að Jermain Defoe verði seldur frá félaginu en fyrrum stjóri Tottenham, Harry Redknapp hefur hug á að fá Defoe til QPR.

Nú þegar ekkert virðist geta komið í veg fyrir að Tottenham selji Gareth Bale til Real Madrid horfir liðið til Christian Eriksen hjá Ajax en talið er að hann muni kosta enska félagið um 10 milljónir punda.