Messan: Ekki stuðningsmönnum að skapi að vinna leiki núna

Gengi Arsenal í ensku úrvalsdeildinni var til umræðunni hjá Messumönnum í þætti gærkvöldsins.

Guðmundur Benediktsson fékk Bjarna Guðjónsson og Gunnleif Gunnleifsson í heimsókn þar sem gengi Lundúnaliðsins var kortlagt. Eftir tap Arsenal á heimavelli gegn Aston Villa í 1. umferðinni fylgdu sannfærandi útisigrar á Fenerbahce og Fulham.

Gunnleifur sagði að líklega væri Arsenal að gera stuðningsmenn liðsins, marga hverja, brjálaða með því að vinna leiki á þessum tímapunkti, þ.e. rétt áður en félagaskiptaglugganum verður lokað.

Vildi Gunnleifur meina að með því gæti Arsene Wenger, stjóri liðsins, bent á að liðið væri nógu gott til að næla í Englandsmeistaratitilinn án frekari liðsstyrks.