Bale í fýlu og mætti ekki á æfingu

Þó svo Gareth Bale sé með margar milljónir í mánaðarlaun hjá Tottenham og enn samningsbundinn félaginu þá fór hann í fýlu og mætti ekki á æfingu í dag.

Það hefur gengið illa hjá Tottenham að ganga frá sölu á leikmanninum til Real Madrid og samkvæmt heimildum Sky Sports er leikmaðurinn brjálaður út í Spurs.

Bale hefur ekkert æft með Spurs upp á síðkastið né spilað með liðinu. Landsliðsþjálfari Wales sagði á dögunum að hann væri ekki í andlegu ástandi til þess að vinna.

Leikmannamarkaðurinn lokar 2. september og er enn búist við því að Bale verði orðinn leikmaður Real Madrid fyrir metfé fyrir þann tíma.