Anelka hættur við að hætta

West Bromwich Albion sendi frá sér yfirlýsingu í dag þar sem fram kemur að franski framherjinn Nicolas Anelka sé hættur við að hætta og muni spila áfram með enska úrvalsdeildarliðinu.

Hinn 34 ára gamli Nicolas Anelka hefur verið fjarverandi síðan á fimmtudaginn var þegar hann yfirgaf æfingu félagsins og tilkynnti í framhaldinu að hann vildi leggja skóna á hilluna.

Anelska var aðeins búinn að spila einn leik með West Bromwich Albion en hann kom til félagsins eftir stutta dvöl hjá kínverska liðinu Shanghai Shenhua og ítalska liðinu Juventus.

„Albion getur staðfest það að Nicola Anelka mætir aftur á æfingu á morgun og hann verður til taks í leiknum á móti Swansea á sunnudaginn. Framherjinn var leyfi af persónulegum ástæðum í síðustu tveimur leikjum á móti Everton og Newport. Hann hitti knattspyrnustjóranna Steve Clarke í dag og mun síðan hitta liðsfélaga sína á morgun," segir í yfirlýsingunni.

West Bromwich Albion er sjötta lið Nicolas Anelka í ensku úrvalsdeildinni en hann hefur einnig spilað með Arsenal, Liverpool, Manchester City, Bolton og Chelsea. Anelka hefur skorað 122 mörk í 353 leikjum í ensku úrvalsdeildinni og alls 159 mörk fyrir ensk lið í öllum keppnum.