„Ég hef samúð með Luis Suarez“

Michael Owen, fyrrum framherji Liverpool og enska landsliðsins, segist skilja viðhorf Luis Suarez, framherja Liverpool.

„Ég hef samþúið með Luis," segir Owen í viðtali við Telegraph. „Ég er þó ekki á þeirri skoðun að hann sé í fullum rétti til þess að gera allt sem hann hefur gert, fjarri því, en sem knattspyrnumaður skil ég afstöðu hans."

Owen minnir á að Suarez sé einn besti framherji í heiminum.

„Hann vinnur líklega ekki deildina með Liverpool á þessari leiktíð, er ekki einu sinni í Meistaradeildinni og hefur staðið sig frábærlega fyrir liðið. Þetta er grimmur heimur. Maður verður að nýta árin fimmtán til fullnustu," segir Owen sem á sínum tíma gekk í raðir Real Madrid frá Liverpool.

„Fólk ímyndar sér að knattspyrnumenn séu aðeins gráðugir og sýni enga tryggð. Það er hins vegar klárt að væri Suarez ekki jafngóður og hann er hefði Liverpool ekki staðið svo þétt við bak hans í gegnum tíðina. Auðvitað þarftu að hafa í huga hvað fólk hefur gert fyrir þig og sýna þakklæti en þú færð bara eitt líf," segir Owen.

Framherjinn fyrrverandi segist þó ekki skilja það að Suarez vilji yfirgefa Liverpool fyrir Arsenal.

„Ef Real Madrid væri hins vegar möguleiki fyrir hann þá hefði ég fullan skilning á því."