Carragher: Suarez of góður fyrir bæði Liverpool og Arsenal

Jamie Carragher, fyrrverandi leikmaður Liverpool vill meina að framherji Liverpool, Luis Suarez sé of góður bæði fyrir Liverpool og Arsenal sem hafa verið á eftir framherjarnum í sumar. Carragher sem lagði skóna á hilluna í vor verður sérfræðingur hjá Skysports í vetur ásamt því að skrifa vikulega pistla í Daily Mail.

Suarez sem hefur skorað 51 mark í 91 leik fyrir Liverpool hefur verið orðaður við mörg stórlið í Evrópu í sumar. Suarez hefur sjálfur verið yfirlýsingarglaður í fjölmiðlum um ósk sína að yfirgefa Liverpool en félagið virðist ætla að standa á sínu og ætlar ekki að leyfa framherjanum að fara.

„Ef Barcelona, Real Madrid eða Bayern Munchen væru á eftir honum myndi ég óska honum góðs gengis og styðja við bakið á honum. Það eru lið á hans kalíber, lið sem eiga góðan möguleika á að vinna Meistaradeildina. Ég átta mig ekki alveg á ósk hans að fara til Arsenal, þeir hafa ekki barist um titla undanfarin ár, ekki haft mikil áhrif í Meistaradeildinni og engu nær að vinna ensku úrvalsdeildina,"

Þrátt fyrir nokkur tilboð frá Arsenal sem Suarez vill ólmur að Liverpool taki þá ætla Liverpool að halda Suarez.

„Ég fékk að æfa með honum fyrir góðgerðaleikinn í síðustu viku og það var allt annað að sjá hann á æfingum. Frá fyrsta degi hjá klúbbnum æfði hann eins og stríðsmaður sem elskaði fótbolta og sýndi ótrúlega hluti. Viðhorfið hans var frábært og hver æfing var jafn mikilvæg og leikur, markið sem hann skoraði frá miðju gegn Norwich höfðum við séð löngu áður á æfingu. Núna var hinsvegar allt annað að sjá hann, hann vildi ekki boltann og hafði engann áhuga að vera með,"

Suarez æfir einn þessa dagana og kemur það Carragher ekki á óvart.

„Ég bjóst aldrei við að Suarez myndi bregðast við eins og Torres gerði á síðustu mánuðum sínum hjá félaginu. Þú sást á Torres síðustu 18 mánuðina að hann vildi ekki vera þar og núna eru sömu merki á lofti hjá Suarez sem er leiðinlegt. Margir góðir menn hafa staðið með Suarez síðan hann gekk til liðs við Liverpool, bæði Rodgers og Dalglish stóðu þétt við bakið á honum sama hvað gekk á. Suarez ætti að gefa Liverpool eitt ár í viðbót, gera sitt besta og gefa Liverpool virðinguna og hollustu sem þeir eiga skilið," sagði Carragher.