Rooney æfir með enska landsliðinu

Wayne Rooney er mættur til æfinga hjá enska landsliðinu í knattspyrnu en liðið mætir Skotlandi í vináttuleik í vikunni.

Leikmaðurinn hefur aðeins leikið í 45 mínútur með Manchester United á undirbúningstímabilinu vegna smávægilegra meiðsla en hann hefur fengið grænt ljós hjá læknum United að taka þátt í verkefninu með Englandi.

Roy Hodgson, landsliðsþjálfari Englands, hefur fullvissað David Moyes, knattspyrnustjóra Manchester United,  að hann muni ekki taka neinar áhættur með leikmanninn og taka tillit til þeirra meiðsla sem Rooney hefur verið að glíma við.

Rooney hefur gefið það út í sumar að hann vilji yfirgefa Manchester United í sumar og spurning hvar hann leikur á næsta tímabili.