Matej Vydra til WBA á láni

Enska knattspyrnuliðið WBA hefur fengið til liðsins framherjann Matej Vydra frá ítalska úrvalsdeildarliðinu Udinese.

Leikmaðurinn kemur til félagsins á láni út leiktíðina en hann var á láni hjá Watford á síðustu leiktíð þar sem hann gerði 22 mörk en Vydra er 21 árs.

Tékkinn stóðst læknisskoðun hjá félaginu í gær og fór síðan rakleiðis til Ungverjalands þar sem hann mun leika með tékkneska landsliðinu gegn Ungverjum í vináttuleik.

„Þetta er enn einn frábæri framherjinn sem við fáum til liðsins,“ sagði Steve Clarke, knattspyrnustjóri liðsins en fyrr í sumar fékk stjórinn Nicolas Anelka til liðsins.

„Ég er virkilega ánægður með að hafa fengið leikmanninn til félagsins en hann var magnaður á síðustu leiktíð með Watford. Við höfum trú á því að leikmaðurinn geti staðið sig vel í hæsta gæðaflokki.“