Rooney mun berjast fyrir liðið ef hann verður ekki seldur

Gary Neville, fyrrum leikmaður Manchester United, telur að Wayne Rooney eigi eftir að halda sínu striki og spila af fullum krafti hjá Manchester United í vetur ef leikmaðurinn verður ekki seldur frá félaginu.

Leikmaðurinn hefur sjálfur farið fram á sölu frá klúbbnum og virðist ósáttur með stöðu sína hjá Englandsmeisturunum.

Gary Neville er í þjálfarateymi enska landsliðsins  en Rooney æfir þessa dagana með liðinu fyrir vinuáttulandsleikinn gegn Skotum á miðvikudagskvöldið.

Neville var spurður að því hvort hann héldi að Rooney myndi halda áfram að berjast fyrir United ef hann fengi ekki að yfirgefa félagið í sumar.

„Það er enginn vafi í mínum huga, hann mun leggja sig hundrað prósent fram,“ sagði Neville.

„Það kæmi mér stórkostlega á óvart ef hann færi að haga sér illa og tæki jafnvel uppá því að spila ekki fyrir liðið.“

„Hann gekk í gegn um svona tíma fyrir nokkrum árum þegar hann fór fram á sölu en það var leyst og hann hélt áfram að spila af fullum krafti.“

„Ef félagið tekur þá ákvörðun að selja ekki leikmanninn þá tel ég að Rooney eigi eftir að halda áfram að vera atvinnumaður og leika með fullum huga fyrir sinn klúbb.“