Downing genginn til liðs við West Ham

Englendingurinn Stewart Downing hefur gert fjögurra ára samning við enska úrvalsdeildarliðið West Ham United en hann kemur til liðsins frá Liverpool.

West Ham tilkynnti kaupin á vefsíðu sinni fyrr í morgun. Downing hefur verið undanfarin tvö tímabil í herbúðum Liverpool en engan veginn staðið undir væntingum.

Leikmaðurinn var keyptur á 20 milljónir punda til Liverpool en West Ham mun líklega greiða um fimm milljónir punda fyrir Downing.

„Þetta er frábært tækifæri fyrir mig og ég er mjög spenntur fyrir næstu leiktíð. Ég verð klár fyrir fyrsta leikinn gegn Cardiff um helgina,“ sagði Downing á heimasíðu West Ham.