Mourinho vill aftur fjölskyldustemningu hjá Chelsea

Jose Mourinho er tekinn við liði Chelsea á nýjan leik og hann leggur ofurkapp á það að bæta andrúmsloftið í kringum liðið en stuðningsmenn Chelsea voru mjög sundurleitur hópur á meðan Rafael Benitez var við stjórnvölinn.

Chelsea vann sex titla undir stjórn Jose Mourinho á árunum 2004 til 2007 þar af vann liðið ensku deildina 2005 og 2006. Stuðningsmenn félagsins upplifðu þar frábæra tíma.

„Ég vil að við búum saman til bláa fjölskyldu, bláa fjölskyldu sem virkaði sundruð á tímum á síðustu leiktíð. Ég vil sameina alla fjölskylduna á ný og ég vil að allir styðji liðið. Ég vil að leikmennirnir finni stuðninginn og allir stuðningsmennirnir standi á bak við félagið," sagði Jose Mourinho við the Sun

„Ég vil að stuðningsmennirnir séu með okkur bæði á góðu og slæmu tímunum, í köldu veðri og þegar sólin skín, á heimavelli og á útivelli og hvort sem við erum að vinna eða tapa," sagði portúgalski stjórinn.