Nýliðarnir eyddu 50 milljónum punda í sumar

Cardiff City, Crystal Palace og Hull City eru nýliðarnir í ensku úrvalsdeildinni í fótbolta sem hefst á morgun. Cardiff City vann b-deildina og Hull City komst einnig beint upp en Crystal Palace fór í gegnum umspilið eftir að hafa endaði í fimmta sæti deildarinnar.

Það eru mikil viðbrigði að fara upp í ensku úrvalsdeildina og nýliðarnir verða að bæta við sig sterkum leikmönnum ætli þeir að lifa af í deild þeirra bestu. Nýliðarnir hafa reynt að styrkja sig í sumar en alls fengu þessi þrjú félög til sín 23 leikmenn og borguðu fyrir þá 48,5 milljónir punda.

Cardiff City, lið Arons Einars Gunnarssonar, eyddi mestu (26,65 milljónum punda) en í fæsta leikmenn eða "bara" fimm. Crystal Palace fékk 8 nýja leikmenn fyrir 11 milljónir punda og Hull City er með tíu nýja leikmenn en eyddi þó aðeins 10,85 milljónum punda.

Cardiff heimsækir West Ham í fyrsta leik sínum á morgun en hin liðin hefja leik á sunnudaginn. Crystal Palace tekur þá á móti Tottenham en Hull heimsækir Chelsea.