Tíu menn Arsenal töpuðu á heimavelli á móti Villa

Tíu leikmenn Arsenal urðu að sætta sig við 1-3 tap á heimavelli á móti Aston Villa í fyrstu umferð ensku úrvalsdeildarinnar í dag. Anthony Taylor, dómari leiksins á Emirates Stadium, dæmdi tvö víti á Arsenal í leiknum og rak Frakkann Laurent Koscielny af velli á 67. mínútu.

Belginn Christian Benteke skoraði tvö fyrstu mörk Aston Villa í leiknum en það dugði ekki Arsenal að fá draumabyrjun og komast yfir eftir aðeins sex mínútna leik. Bæði mörk Christian Benteke komu eftir vítaspyrnur sem Gabriel Agbonlahor fiskaði en fyrra markið kom þegar Benteke fylgdi eftir víti sínu sem Wojciech Szczesny hafði varið.

Arsene Wenger, knattspyrnustjóri Arsenal, hefur ekki náð að styrkja lið Arsenal í sumar og fær eflaust að lesa mikið um það í ensku fjölmiðlunum á morgun eftir þessa skelfilegu byrjun liðsins.

Olivier Giroud kom reyndar Arsenal yfir strax á 6. mínútu þegar hann skoraði af stuttu færi eftir frábæran undirbúning Alex Oxlade-Chamberlain. Draumabyrjun en hún stóð ekki lengi.

Gabriel Agbonlahor gerði vel í að fiska víti á Wojciech Szczesny á 22. mínútu. Wojciech Szczesny varði víti Christian Benteke en belgíski framherjinn náði að skalla frákastið í markið og jafna leikinn.

Agbonlahor fiskaði annað víti á 61. mínútu leiksins og nú á Frakkann Laurent Koscielny. Christian Benteke steig aftur á punktinn og nú skoraði hann af miklu öryggi. Aðeins sex mínútum síðar fékk Koscielny síðan sitt annað gult fyrir litlar sakir og þar með rautt. Arsenal var því manni færri síðustu 23 mínútur leiksins.

Bakvörðurinn Antonio Luna innsiglaði síðan sigurinn á 85. mínútu eftir að Aston Villa náði skyndisókn í kjölfar hornspyrnu Arsenal.