Erfið byrjun hjá Aroni Einari og félögum

West Ham vann sannfærandi 2-0 sigur á Cardiff í fyrstu umferð ensku úrvalsdeildinni í dag en nýliðarnir átti ekki mikla möguleika á Upton Park í dag. Íslenski landsliðsfyrirliðinn Aron Einar Gunnarsson spilaði allan leikinn á miðju Cardiff.

Reynsluboltarnir Joe Cole og Kevin Nolan sáu um mörkin fyrir West Ham í dag en það bendir margt til þess ef marka má þennan leik að fyrsta tímabilið í ensku úrvalsdeildinni gæti verið erfitt fyrir Cardiff-liðið.

Joe Cole kom West Ham í 1-0 strax á 13. mínútu þegar hann tók laglega við fyrirgjöf Matt Jarvis og skoraði með laglegu skoti.

Kevin Nolan bætti við öðru marki á 76. mínútu með öðru góðu skoti nú eftir stoðsendingu frá Mark Noble.

Cardiff-liðið komst lítið áleiðis á móti liði West Ham, skapaði lítið sem ekkert og sigur West Ham var öruggur.