Ekki í fyrsta sinn sem menn klikka á víti á móti Mignolet á Anfield

Simon Mignolet, nýi Belginn í marki Liverpool, bjargaði tveimur stigum fyrir sitt lið í dag þegar hann varði vítaspyrnu rétt fyrir leikslok. Þetta var frábær byrjun hjá kappanum í fyrsta deildarleik sínum fyrir Liverpool - varið víti, hreint mark og þrjú stig í húsi.

Simon Mignolet varði víti Jonathan Walters á 88. mínútu leiksins og var fagnað vel af félögum sínum í Liverpool-liðinu.

Þetta var hinsvegar ekki í fyrsta skiptið sem leikmaður klikar á víti á móti Simon Mignolet á Anfield. Luis Suarez skaut yfir markið úr víti á móti honum í fyrstu umferð 2011 þegar Mignolet var markvörður Sunderland. Liverpool varð að sætta sig við 1-1 jafntefli í þeim leik.

Simon Mignolet er 25 ára gamall og Liverpool keypti hann í sumar fyrir um níu milljónir punda frá Sunderland.