Paul Lambert: Vorum óhugnanlega góðir

Paul Lambert, knattspyrnustjóri Aston Villa, var að sjálfsögðu í skýjunum eftir 3-1 sigur á Arsenal á Emirates-leikvanginum í kvöld í fyrstu umferð ensku úrvalsdeildarinnar.

Aston Villa fékk tvö víti í leiknum og Arsenal lék manni færri frá 67. mínútu en það dugði ekki Arsenal að komast í 1-0 strax á 6. mínútu leiksins.

„Við vorum frábærir eftir að við komust í gegnum þessa erfiðu byrjun og skyndisóknir okkar voru sérstaklega góðar. Við vorum óhugnanlega góðir á köflum," sagði Paul Lambert.

„Ég hef ekki séð mann spila betur í mörg ár en Gabriel Agbonlahor í þessum leik og þeir réðu ekkert við hann," sagði Lambert en Agbonlahor fiskaði bæði vítin.

„Við vorum mjög sterkir fremst á vellinum þar sem Agbonlahor ógnaði mikið með hraða sínum. Brad Guzan átti líka tvær heimsklassamarkvörslur. Við áttum skilið að vinna þennan leik," sagði Lambert.