Osvaldo til Southampton

Enska úrvalsdeildarliðið Southampton staðfesti í kvöld kaup sín á ítalska framherjanum, Pablo Osvaldo en hann var keyptur frá Roma á Ítalíu. Verðmiðinn á Osvaldo er talinn vera í kringum þrettán milljónir punda.

Liðið er greinilega með háleit markmið í sumar en leikmaðurinn er sá dýrasti í sögu félagsins. Osvaldo lék áður undir stjórn Mauricio Pochettino hjá Espanyol en Pochettino er knattspyrnustjóri Southampton í dag.

Kaupin á Osvaldo eru þau þriðju sem félagið gerir í sumar en áður höfðu þeir Dejan Lovren og Victor Wanyama komið til liðsins.