Scott Parker að verða búinn með Lundúnafélögin

Enski miðjumaðurinn Scott Parker hefur fært sig um set í Lundúnum og er nýjasti liðsmaður Fulham.

Parker hefur samið við Fulham til þriggja ára en hann var áður í röðum Tottenham. Fulham verður fimmti viðkomustaður Parker í London.

Parker sló fyrst í gegn hjá Charlton en söðlaði svo um og gekk í raðir Chelsea. West Ham og Tottenham nutu einnig krafta miðjumannsins. Parker flutti sig þó um tíma frá Lundúnum og spilaði með Newcastle í Norður-Englandi.

Parker, sem á átján landsleiki að baki fyrir England, stóð einnig til boða að ganga í raðir QPR í Championship-deildinni. QPR er einmitt einnig staðsett í Lundúnum.