Luis Suarez leitar allra leiða til að losna

Luis Suarez, framherji Liverpool, er ekki sáttur við að fá ekki að fara til Arsenal og BBC hefur heimildir fyrir því að Úrúgvæmaðurinn sé að pæla í því að leggja inn formlega félagsskiptabeiðni. Það fylgir fréttinni á BBC að það sé jafnvel möguleiki á því Suarez fari með málið fyrir dómstóla fái hann sig ekki lausan.

Hinn 26 ára gamli Luis Suarez er á því að tilboð Arsenal upp á 40 milljón pund og einu pundi betur sé nóg til þess að fá hann lausan samkvæmt klausu í samningi hans við Liverpool.

Liverpool hafnaði tilboðinu og gaf það út að klausan í samningnum geti ekki þvingað félagið til þess að selja stjörnuframherjann sinn.

Suarez þekkir það að fara með svona mál fyrir dómstóla því þannig fékk hann sig lausan frá Groningen árið 2007 þegar Ajax var á eftir honum. Liverpool keypti hann síðan frá Ajax í janúar 2011.

Suarez skoraði 30 mörk í 44 leikjum fyrir Liverpool á síðasta tímabili en endaði leiktíðina á því að vera dæmdur í tíu leikja bann fyrir að bíta Branislav Ivanovic. Hann á enn eftir að klára sex leiki af banninu.