"Leyfið mér að fara eins og þið lofuðuð mér"

Luis Suarez hefur gefið það út að hann vilji yfirgefa herbúðir Liverpool. Hann segir forráðamenn félagsins hafa lofað sér að hann fengi að fara í sumar.

Suarez segir í viðtali við Guardian að hann sé tilbúinn að óska formlega eftir því að fara á sölulista neiti Liverpool honum um félagaskipti til Arsenal.

Arsenal bauð 40 milljónir punda og einu pensi betur í Úrúgvæann á dögunum. Þetta eina pens þýddi að Liverpool var skuldbundið til þess að tilkynna Suarez að tilboð hefið borist í kappann.

„Á síðasta ári hafði ég möguleika á að ganga í raðir stórliðs í Evrópu. Ég var um kyrrt en skildi forráðamenn Liverpool þannig að ef okkur tækist ekki að tryggja okkur sæti í Meistaradeildinni þá mætti ég fara," segir Suarez við Guardian.

„Ég gaf allt sem ég átti fyrir Liverpool á síðustu leiktíð en það dugði ekki til þess að hafna í einu af fjórum efstu sætunum," segir Suarez. Hann eigi bara eina ósk í dag: „Að Liverpool standi við loforð sitt."

Suarez er gallharður á afstöðu sinni. Hann segist hafa loforð frá Liverpool bæði í orði og á borði.

„Þeir gáfu mér loforð og við skrifuðum undir samning. Ég get farið með hann á borð ensku úrvalsdeildarinnar og látið þá skera út um þetta. Ég vil þó helst ekki þurfa að ganga svo langt."