Fullkomið tap fyrir Mourinho

Cristiano Ronaldo skoraði tvívegis og lagði upp eitt mark í 3-1 sigri Real Madrid á Chelsea í æfingaleik í Miami í nótt.

Ronaldo lagði upp fyrsta mark leiksins fyrir Brasilíumanninn Marcelo. Landi hans Ramires hjá Chelsea jafnaði metin skömmu síðari með snyrtilegu marki.

Portúgalinn skoraði svo sjálfur úr aukaspyrnu eftir hálftímaleik og Spánverjarnir leiddu með einu marki í hálfleik. Ronaldo skoraði þriðja markið með skalla í síðari hálfleik og þá voru úrslitin ráðin.

„Þetta var fullkomið. Við gerðum mistök sem við getum nú lagað," sagði Jose Mourinho í leikslok. Stjóri Chelsea, sem undanfarin tvö tímabil réð ríkjum hjá Real Madrid, minnti á að liðið hefði fyrir leikinn unnið fimm leiki á undirbúningstímabilinu án þess að fá nokkur stig. Nú væru leikirnir sex, fimm sigrar og eitt tap, en eftir sem áður væri liðið stigalaust enda allt æfingaleikir.

„Ef við mætumst í Meistaradeildinni værum við að ræða málin á öðrum nótum. En sumarmót eru sumarmót," sagði Mourinho.

David Luiz og Juan Mata gátu ekki spilað með Chelsea vegna meiðsla.