Leggur skóna á hilluna á afmælisdaginn

Knattspyrnukappinn Louis Saha, sem á sínum tíma lék með Fulham, Everton og Manchester United í ensku úrvalsdeildinni, hefur lagt skóna á hilluna.

Frakkinn, sem var síðasta á mála hjá Lazio á Ítalíu, tilkynnti ákvörðun sína á Twitter í dag. Hann segir stoltur af ferli sínum og óskar ungum knattspyrnumönnum góðs gengis í framtíðinni.

Saha sló í gegn hjá Metz árið 1997 sem gaf honum tækifæri á að spila með Newcastle í ensku úrvalsdeildinni tímabilið 1998-1999. Hann gekk í raðir Fulham árið 2000 og hjálpaði liðinu að vinna sæti í deild þeirra bestu.

Saha var keyptur til Manchester United á 12,8 milljónir punda í janúar 2004 og varð tvívegis Englandsmeistari með liðinu auk þess að vinna Meistaradeildina árið 2008.

Hann gekk í raðir Everton eftir fjögur og hálft ár hjá United. Síðar nutu Tottenham, Sunderland og nú síðast Lazio krafta framherjans.

Saha spilaði 20 landsleiki fyrir Frakkland og skoraði í þeim fjögur mörk. Hann missti af úrslitaleik HM 2006 þar sem hann var í leikbanni.