Mourinho: Barcelona fær ekki David Luiz

Jose Mourinho, knattspyrnustjóri Chelsea, segir Barcelona geti gleymt því að reyna að kaupa Brasilíumanninn David Luiz frá Chelsea. Barcelona er að leita að nýjum miðverði og hefur mikinn áhuga á David Luiz.

„Ef Barcelona þarf á miðverði að halda þá ráðlegg ég þeim að einbeita sér að næstefsta nafninu á óskalistanum því þeir eru að eyða tímanum til einskis að reyna við David Luiz," segir Jose Mourinho.

Barcelona reyndi að kaupa Thiago Silva frá franska liðinu Paris Saint Germain á dögunum en PSG vildi ekki láta frá sér Brasilíumanninn. Barca horfði þá til landa hans hjá Chelsea en það ætlar að ganga jafnilla.

David Luiz og Juan Mata voru ekki með Chelsea á móti Real Madrid í vikunni þar sem þeir glímdu við smávægileg meiðsli. Mourinho saknaði þeirra beggja en Chelsea tapaði leiknum 1-3.

„Þeir eru báðir mikilvægir leikmenn. Okkar lið er betra með þá David Luiz og Mata innanborðs. Við tökum samt ekki neina áhættu með leikmenn á undirbúningstímabilinu," svaraði Mourinho.